啱啱過完農曆新年，過年期間，總會經常聽到什麼「十二生肖」虎年運程嘅預告，呢類型嘅資料多的是，搞到原本都唔太相信命理嘅我，循例都會聽吓，當應吓節。運程話本人今年有出門運，聽到後一陣心寒，出埠旅遊嘅話，固之然係好事，但係出埠工作嘅話，就未必係一件好事喇！不過，出門工作時，間中都會得到一啲安慰……
話說有次去到台北，只係隨便進入一間二手服裝店，同售貨員講起本人喺〈yes!!〉工作，售貨員即刻好興奮咁話：「啊！〈yes!!〉啊，有聽過呀，蠻不錯嘛！」聽到連台北地道嘅售貨員都知道〈yes!!〉嘅存在，真係何其安慰！不過最終都係緊張買衫會唔會有折頭哩！
另有一次經歷，就係去到汶萊一間電台（相信Fans都估到去汶萊係為咗採訪邊個喇！）記者呈上卡片，當地工作人員即話：「〈yes!!〉在汶萊很出名，很多人都有看啊！」以上絕對真人真事，心諗係真唔係真呀？還是應該多謝吳生先得知呢個好消息呢!?
除咗以上地區外，不時都聽到加拿大、溫哥華、內地、澳門等地方傳嚟〈yes!!〉讀者嘅支持聲音！無論如何，〈yes!!〉快將邁向20年，出版期數亦快將到達1000期嘞！原來喺不知不覺間，〈yes!!〉已經衝出咗香港。
〈yes!!〉都一樣，偶像人物早已衝出香港地區，今期就有韓國當紅偶像組合FT Island同香港代表江若琳，更有全新3月加碼嘅送大禮！
P.S.一句，密切期待〈yes!!〉1000期嘅慶祝連環炮!!
